ଶ୍ରୀଜଗନ୍ନାଥସପ୍ତକମ୍
ପ୍ରକାଶକାନ୍ତଚିନ୍ମୟଂ ପ୍ରସନ୍ନଦାରୁବିଗ୍ରହଂ
ପ୍ରଫୁଲ୍ଲଫୁଲ୍ଲସୁନ୍ଦରଂ ପୁରୀପ୍ରମୋଦମନ୍ଦିରମ୍ ।
ବିଷାଣୁସଂଘଶୋଷିଣଂ ବିଶାଳୱୈଦ୍ୟଘୋଷିଣଂ
ସହାସ୍ୟଗୋଲଲୋଚନଂ ମହାପ୍ରଭୁଂ ଭଜାମ୍ୟହମ୍ ॥ ୧॥
ପରମ୍ପରାବିମଣ୍ଡିତଂ ତଟେ ବଟେ ମଠେ ରତଂ
ମହାପ୍ରସାଦମଜ୍ଜିତଂ ମହାନୁଭାବସଜ୍ଜିତମ୍ ।
ସୁବର୍ଣ୍ଣକୀର୍ଣ୍ଣନିର୍ଜିତଂ ସମନ୍ଦମନ୍ଦହାସିତଂ
ପହଣ୍ଡିନୃତ୍ୟପଣ୍ଡିତଂ ଜଗଦ୍ଗୁରୁଂ ଭଜାମ୍ୟହମ୍ ॥ ୨॥
ତ୍ରିତାପପାପନାଶକଂ ତ୍ରିଧାତୁଦୋଷଘାତକଂ
ସୁପଞ୍ଚଭୂତଶୋଧକଂ ବିଷାଣୁବେଗରୋଧକମ୍ ।
ନିତାନ୍ତଶାନ୍ତିଦାୟକଂ ମହାର୍ତ୍ତିନାଶକାରକଂ
ସଦା ଜଗତ୍ସୁରକ୍ଷକଂ ମହାପ୍ରଭୁଂ ଭଜାମ୍ୟହମ୍ ॥ ୩॥
ରଥେ କଦାପି ସତ୍ୱରଂ ବିଚିତ୍ରବୀର୍ଯ୍ୟମୀଶ୍ଵରଂ
ମୁଖାରବିନ୍ଦସିନ୍ଦୂରଂ ସଗଦ୍ଗଦଂ ସୁଧାସରମ୍ ।
ମହାପୁରାଣସତ୍କରଂ ମହେଶ୍ଵରୀପୁରଃସରଂ
ସଘୋଷହର୍ଷତତ୍ପରଂ ସଦାଶିଵଂ ଭଜାମ୍ୟହମ୍ ॥ ୪॥
ନିବାସନୀଳପର୍ବତଂ ପ୍ରଫୁଲ୍ଲପୀତସତ୍ପଟଂ
ସମସ୍ତୱୈଷ୍ଣବାଶ୍ରିତଂ ସମୁଦ୍ରକୂଳନିର୍ଜିତମ୍ ।
ନିତାନ୍ତଶାନ୍ତଚିଦ୍ଘନଂ ଘନାଘନପ୍ରଭାଯୁତଂ
ନିୟନ୍ତୃରୋଗଭୌତିକଂ ଭିଷଗ୍ବରଂ ଭଜାମ୍ୟହମ୍ ॥ ୫॥
ଗ୍ରହେଶଦର୍ପହାରିଣଂ ଖଗେଶୟାନଚାରିଣଂ
ନୃଶଂସ-କଂସମର୍ଦ୍ଦନଂ ସମସ୍ତଗୋପଶାସନମ୍ ।
ସରାଗରାଧିକାଧୱଂ କୃପାଳୁନୀଳମାଧବଂ
ନବୀନଯୌବନୋଜ୍ଵଳଂ ଭଜେ ନିଚୋଳମୁଜ୍ଜ୍ୱଳମ୍ ॥ ୬॥
ନିଯୋଗଭୋଗଭକ୍ଷଣଂ ବିଯୋଗବେଗମର୍ଷଣଂ
ସୁପୁଷ୍ପହାରଧାରିଣଂ ଚରାଚରସ୍ୟ ପାରିଣମ୍ ।
ସମନ୍ତ୍ରତନ୍ତ୍ରନାୟକଂ ପ୍ରବୀଣବେଣୁବାଦକଂ
ବିଷାଣୁମୁକ୍ତିଦାୟକଂ ଭଜେ ସୁଖପ୍ରଦାୟକମ୍ ॥ ୭॥
ଇତି ପ୍ରଦୀପ୍ତନନ୍ଦଶର୍ମବିରଚିତଂ ଶ୍ରୀଜଗନ୍ନାଥସପ୍ତକଂ ସମ୍ପୂର୍ଣ୍ଣମ୍ ॥