*ସଂସ୍କାର*
ସଂସ୍କାର ଅଟଇ ଶରୀର ଓ ମନ
ଆତ୍ମାର ଶୁଦ୍ଧିକରଣ ,
ପବିତ୍ରତା ଭାବ ନୈତିକତା ବୋଧ
ଆଚାର ବ୍ଯବହାରେଣ ।
ମାତା ପିତା ତଥା ପରିବାର ଠାରୁ
ମିଳଇ ସଂସ୍କାର ଶିକ୍ଷା ,
ସଂସ୍କାରିତ ହେଲେ ଉତ୍ତମ ବ୍ଯକ୍ତିତ୍ବ
ପରିଚୟେ ପରାକାଷ୍ଠା ।
ଉତ୍ତମ ସଂସ୍କାରେ ମିଳିଥାଏ ପରା
ମାତା ପିତାଙ୍କୁ ସମ୍ମାନ ,
ସତ୍ଯନିଷ୍ଠା ଏକାଗ୍ରତା ସହଯୋଗ
ଅଟେ ସଂସ୍କାର ଲକ୍ଷଣ ।
ରାଷ୍ଟ୍ରଭକ୍ତି କର୍ତ୍ତବ୍ଯନିଷ୍ଠା ଆବର
ଶ୍ରଦ୍ଧା ସହନଶୀଳତା ,
ଉଜ୍ଜ୍ବଳ ଚରିତ୍ର ଜ୍ଯେଷ୍ଠଙ୍କୁ ସମ୍ମାନ
ଈଶ୍ବର ଭାବନା ଚିନ୍ତା ।
ଉତ୍ତମ ସଂସ୍କାରେ ଏ ଦଶ ଲକ୍ଷଣ
ମିଳଇ ଯେ ବ୍ଯକ୍ତି ଠାରେ ,
ସଂସ୍କାରିତ ଭାବେ ହୁଏ ଗ୍ରହଣୀୟ
ସେହି ବ୍ଯକ୍ତି ସମାଜରେ ।
ସଂସ୍କାର କିପରି ମାତା ପିତା ଠାରୁ
ଆସିଥାଏ ତାହା ମୁହିଁ ,
କରଇ ବର୍ଣ୍ଣନା ଏହି କବିତାରେ
ପାଠକ ମାନଙ୍କ ପାଇଁ ।
ରାଜାଙ୍କର ଥିଲା ଅତୀବ ପ୍ରିୟ ଯେ
ସୁନ୍ଦର ଘୋଡ଼ୀ ଟେ ଜାଣ ,
ତା ଉପରେ ବସି କରିଥାନ୍ତି ରାଜା
ନଗର ପରିଭ୍ରମଣ ।
କାଳକ୍ରମେ ସେହି ଘୋଡ଼ୀ ଠାରୁ ଜନ୍ମ
ନେଲା ଘୋଡ଼ାର ଶାବକ ,
ସେହି ଶାବକର ଜନ୍ମକାଳୁ ନଷ୍ଟ
ହୋଇଥିଲା ଚକ୍ଷୁ ଏକ ।
ଶାବକଟି ଦିନେ ପଚାରେ ମାଆକୁ
ଚକ୍ଷୁ ନଷ୍ଟ କାହା ପାଇଁ ,
ଘୋଡ଼ୀ କହିଥିଲା ରାଜାଙ୍କ ଚାବୁକ
ମାଡ଼ ଖାଇଥିଲି ମୁହିଁ ।
ମୋ ଆଖିରେ ସେହି ଆଘାତ ବେଳରେ
ଗରଭରେ ତୁହି ଥିଲୁ ,
ସେ ପାଇଁ ତୋହର ଆଖି ଧନମଣି
ହରାଇ ଜନମ ନେଲୁ ।
କ୍ରୋଧରେ ଶାବକ କହଇ ମାଆଲୋ
ପ୍ରତିଶୋଧ ନେବି ମୁହିଁ ,
ମୋ ଉପରେ ରାଜା ବସିଥିଲା ବେଳେ
କଚାଡ଼ି ମାରିବି ତହିଁ ।
ମାଆ କହିଲା ସେ ଆମ ଅନ୍ନଦାତା
ଆମ ପାଇଁ ଭଗବାନ ,
ତାଙ୍କ ଅମଙ୍ଗଳ ପାରିବାନି ଚିନ୍ତି
ସହିଯିବା ହିଁ ଉତ୍ତମ ।
ଘୋଡ଼ା ଶାବକଟି ବଡ଼ ହେଲା ପରେ
ରାଜା ତା'ଉପରେ ବସି ,
ଯାଇଥିଲେ ଦିନେ ଯୁଦ୍ଧ କରିବାକୁ
ସେଠାରେ ପଡ଼ିଲେ ଖସି ।
ଭାବିଥିଲା ଘୋଡ଼ା ରାଜାଙ୍କୁ ନ ଆଣି
ପଳାଇ ଆସିବ ଘର ,
ଶତ୍ରୁମାନେ ଏକୁଟିଆ ପାଇ ତାଙ୍କୁ
ମାରିଦେବେ ସେହିଠାର ।
ହେଲେ ସେ ପଳାଇ ନ ଆସି ସାଙ୍ଗରେ
ରାଜାଙ୍କୁ ଆଣିଲା ସାଥେ ,
ମାଆକୁ କହିଲା ପାରିଲିନି ମୁହିଁ
ନେଇ ପ୍ରତିଶୋଧ ଏଥେ ।
ମାଆ ଘୋଡ଼ୀ କହେ ପାଇଅଛୁ ଧନ
ପରିବାରରୁ ସଂସ୍କାର ,
ସେବକ ହୋଇକି ସହିଯିବା ଆମେ
ଦୋଷ ଆମ ମାଲିକର ।
ଜୟ ଶ୍ରୀଜଗନ୍ନାଥ ।
ତରୁଣ କୁମାର ମିଶ୍ର ।
ଖଣ୍ଡଗିରି ,ଭୁବନେଶ୍ବର ।
ମୋ-9853310292