ଏକଦନ୍ତଂ ମହାକାୟଂ ତପ୍ତକାଞ୍ଚନସନ୍ନିଭମ୍ ।
ଲମ୍ବୋଦରଂ ବିଶାଲାକ୍ଷଂ ବନ୍ଦେଽହଂ ଗଣନାୟକମ୍ ॥ ୧॥
ମୌଞ୍ଜୀକୃଷ୍ଣାଜିନଧରଂ ନାଗୟଜ୍ଞୋପବୀତିନମ୍ ।
ବାଲେନ୍ଦୁସୁକଲାମୌଲିଂ ବନ୍ଦେଽହଂ ଗଣନାୟକମ୍ ॥ ୨॥
ଅମ୍ବିକାହୃଦୟାନନ୍ଦଂ ମାତୃଭିଃ ପରିବେଷ୍ଟିତମ୍ ।
ଭକ୍ତିପ୍ରିୟଂ ମଦୋନ୍ମତ୍ତଂ ବନ୍ଦେଽହଂ ଗଣନାୟକମ୍ ॥ ୩॥
ଚିତ୍ରରତ୍ନବିଚିତ୍ରାଙ୍ଗଂ ଚିତ୍ରମାଲାବିଭୂଷିତମ୍ ।
ଚିତ୍ରରୂପଧରଂ ଦେବଂ ବନ୍ଦେଽହଂ ଗଣନାୟକମ୍ ॥ ୪॥
ଗଜବକ୍ତ୍ରଂ ସୁରଶ୍ରେଷ୍ଠଂ କର୍ଣଚାମରଭୂଷିତମ୍ ।
ପାଶାଙ୍କୁଶଧରଂ ଦେବଂ ବନ୍ଦେଽହଂ ଗଣନାୟକମ୍ ॥ ୫॥
ମୂଷକୋତ୍ତମମାରୁହ୍ୟ ଦେବାସୁରମହାହବେ
ଯୋଦ୍ଧୁକାମଂ ମହାବୀର୍ୟଂ ବନ୍ଦେଽହଂ ଗଣନାୟକମ୍ ॥ ୬॥
ଯକ୍ଷକିନ୍ନରଗନ୍ଧର୍ୱୈସ୍ସିଦ୍ଧବିଦ୍ୟାଧରୈସ୍ସଦା
ସ୍ତୂୟମାନଂ ମହାବାହୁଂ ବନ୍ଦେଽହଂ ଗଣନାୟକମ୍ ॥ ୭॥
ସର୍ୱବିଘ୍ନହରଂ ଦେବଂ ସର୍ୱବିଘ୍ନବିବର୍ଜିତମ୍ ।
ସର୍ୱସିଦ୍ଧିପ୍ରଦାତାରଂ ବନ୍ଦେଽହଂ ଗଣନାୟକମ୍ ॥ ୮॥
ଗଣାଷ୍ଟକମିଦଂ ପୁଣ୍ୟଂ ଯଃ ପଠେ ସତତଂ ନରଃ
ସିଦ୍ଧ୍ୟନ୍ତି ସର୍ୱକାର୍ୟାଣି ବିଦ୍ୟାବାନ୍ ଧନବାନ୍ ଭବେତ୍ ॥ ୯॥
ଇତି ଶ୍ରୀଗଣନାୟକାଷ୍ଟକଂ ସମ୍ପୂର୍ଣମ୍ ।