ଅଚ୍ୟୁତଂ କେଶବଂ ରାମନାରାୟଣଂ
କୃଷ୍ଣଦାମୋଦରଂ ବାସୁଦେବଂ ହରିମ୍ ।
ଶ୍ରୀଧରଂ ମାଧବଂ ଗୋପିକାବଲ୍ଲଭଂ
ଜାନକୀନାୟକଂ ରାମଚନ୍ଦ୍ରଂ ଭଜେ ॥ ୧॥
ଅଚ୍ୟୁତଂ କେଶବଂ ସତ୍ୟଭାମାଧବଂ
ମାଧବଂ ଶ୍ରୀଧରଂ ରାଧିକାରାଧିତମ୍ ।
ଇନ୍ଦିରାମନ୍ଦିରଂ ଚେତସା ସୁନ୍ଦରଂ
ଦେବକୀନନ୍ଦନଂ ନନ୍ଦନଂ ସନ୍ଦଧେ ॥ ୨॥
ବିଷ୍ଣବେ ଜିଷ୍ଣବେ ଶଙ୍ଖିନେ ଚକ୍ରିଣେ
ରୁକ୍ମିଣିର଼ାଗିଣେ ଜାନକୀଜାନୟେ ।
ବଲ୍ଲବୀବଲ୍ଲଭାୟାଽର୍ଚ୍ଚିତାୟାତ୍ମନେ
କଂସବିଧ୍ୱଂସିନେ ବଂଶିନେ ତେ ନମଃ ॥ ୩॥
କୃଷ୍ଣ ଗୋବିନ୍ଦ ହେ ରାମ ନାରାୟଣ
ଶ୍ରୀପତେ ବାସୁଦେବାଜିତ ଶ୍ରୀନିଧେ ।
ଅଚ୍ୟୁତାନନ୍ତ ହେ ମାଧବାଧୋକ୍ଷଜ
ଦ୍ୱାରକାନାୟକ ଦ୍ରୌପଦୀରକ୍ଷକ ॥ ୪॥
ରାକ୍ଷସକ୍ଷୋଭିତଃ ସୀତୟା ଶୋଭିତୋ
ଦଣ୍ଡକାରଣ୍ୟଭୂପୁଣ୍ୟତାକାରଣଃ ।
ଲକ୍ଷ୍ମଣେନାନ୍ୱିତୋ ବାନରୈଃ
ସେବିତୋଽଗସ୍ତ୍ୟସମ୍ପୂଜିତୋ ରାଘବଃ ପାତୁ ମାମ୍ ॥ ୫॥
ଧେନୁକାରିଷ୍ଟକୋଽନିଷ୍ଟକୃଦ୍ଦ୍ୱେଷିଣାଂ
କେଶିହା କଂସହୃଦ୍ୱଂଶିକାବାଦକଃ ।
ପୂତନାକୋପକଃ ସୂରଜାଖେଳନୋ
ବାଳଗୋପାଳକଃ ପାତୁ ମାମ୍ ସର୍ବଦା ॥ ୬॥
ବିଦ୍ୟୁଦୁଦ୍ୟୋତବତ୍ପ୍ରସ୍ଫୁରଦ୍ୱାସସଂ
ପ୍ରାବୃଡମ୍ଭୋଦବତ୍ପ୍ରୋଲ୍ଲସଦ୍ୱିଗ୍ରହମ୍ ।
ବନ୍ୟଯା ମାଳୟା ଶୋଭିତୋରଃସ୍ଥଳଂ
ଲୋହିତାଙ୍ଘ୍ରିଦ୍ୱୟଂ ବାରିଜାକ୍ଷଂ ଭଜେ ॥ ୭॥
କୁଞ୍ଚିତୈଃ କୁନ୍ତଲୈର୍ଭ୍ରାଜମାନାନନଂ
ରତ୍ନମୌଳିଂ ଲସତ୍କୁଣ୍ଡଳଂ ଗଣ୍ଡୟୋଃ ।
ହାରକେୟୂରକଂ କଙ୍କଣପ୍ରୋଜ୍ଜ୍ୱଳଂ
କିଙ୍କିଣୀମଞ୍ଜୁଳଂ ଶ୍ୟାମଳଂ ତଂ ଭଜେ ॥ ୮॥
ଅଚ୍ୟୁତସ୍ୟାଷ୍ଟକଂ ଯଃ ପଠେଦିଷ୍ଟଦଂ
ପ୍ରେମତଃ ପ୍ରତ୍ୟହଂ ପୂରୁଷଃ ସସ୍ପୃହମ୍ ।
ବୃତ୍ତତଃ ସୁନ୍ଦରଂ କର୍ତୃ ବିଶ୍ୱମ୍ଭରସ୍ତସ୍ୟ
ବଶ୍ୟୋ ହରିର୍ଜାୟତେ ସତ୍ୱରମ୍ ॥ ୯॥
ଇତି ଶ୍ରୀଶଙ୍କରାଚାର୍ଯ୍ୟ ବିରଚିତମଚ୍ୟୁତାଷ୍ଟକଂ ସମ୍ପୂର୍ଣ୍ଣମ୍