🕉‼️ଶ୍ରୀ ଜଗନ୍ନାଥପଞ୍ଚକମ୍ ‼️🕉
**************************
ରକ୍ତାମ୍ଭୋରୁହଦର୍ପଭଞ୍ଜନ ମହାସୌନ୍ଦର୍ଯ୍ୟ ନେତ୍ରଦ୍ଵୟଂ,
ମୁକ୍ତାହାର ଵିଲମ୍ବିହେମମୁକୁଟଂ ରତ୍ନୋଜ୍ଜ୍ଵଲତ୍କୁଣ୍ଡଳମ୍ ।
ଵର୍ଷାମେଘସମାନ ନୀଳଵପୁଷଂ ଗ୍ରୈଵେୟହାରାନ୍ଵିତଂ
ପାର୍ଶ୍ଵେଚକ୍ରଧରଂ ପ୍ରସନ୍ନଵଦନଂ ନୀଳାଦ୍ରିନାଥଂ ଭଜେ ॥ ୧॥
ଫୁଲ୍ଲେନ୍ଦୀ ଵରଲୋଚନଂ ନଵଘନ ଶ୍ୟାମାଭିରାମାକୃତିଂ,
ଵିଶ୍ଵେଶଂ କମଳା ଵିଳାସ ଵିଳସତ୍ପାଦାରଵିନ୍ଦ ଦ୍ଵୟମ୍ ।
ଦୈତ୍ୟାରିଂ ସକଳେନ୍ଦୁ ମଣ୍ଡିତମୁଖଂ ଚକ୍ରାବ୍ଜ ହସ୍ତଦ୍ଵୟଂ,
ଵନ୍ଦେ ଶ୍ରୀପୁରୁଷୋତ୍ତମଂ ପ୍ରତିଦିନଂ ଲକ୍ଷ୍ମୀନିଵାସାଳୟମ୍ ॥ ୨॥
ଉଦ୍ୟନ୍ନୀରଦ ନୀଳ ସୁନ୍ଦରତନୁଂ ପୂର୍ଣେନ୍ଦୁ ବିମ୍ବାନନଂ
ରାଜୀଵୋତ୍ପଲ ପତ୍ରନେତ୍ର ୟୁଗଲଂ କାରୁଣ୍ୟ ଵାରାଂନିଧିମ୍ ।
ଭକ୍ତାନାଂ ସକଲାର୍ତି ନାଶନକରଂ ଚିନ୍ତାର୍ଥି ଚିନ୍ତାମଣିଂ,
ଵନ୍ଦେ ଶ୍ରୀପୁରୁଷୋତ୍ତମଂ ପ୍ରତିଦିନଂ ନୀଳାଦ୍ରିଚୂଡାମଣିମ୍ ॥ ୩॥
ନୀଲାଦ୍ରୌ ଶଙ୍ଖମଧ୍ୟେ ଶତଦଳ କମଳେ ରତ୍ନସିଂହାସନସ୍ଥଂ,
ସର୍ଵାଳଂକାରଯୁକ୍ତଂ ନଵଘନ ରୁଚିରଂ ସଂଯୁତଂ ଚାଗ୍ରଜେନ ।
ଭଦ୍ରାୟା ଵାମଭାଗେ ରଥଚରଣଯୁତଂ ବ୍ରହ୍ମରୁଦ୍ରେନ୍ଦ୍ର ଵଂଦ୍ୟଂ,
ଵେଦାନାଂ ସାରମୀଶଂ ସୁଜନପରିଵୃତଂ ବ୍ରହ୍ମଦାରୁଂ ସ୍ମରାମି ॥ ୪॥
ଦୋର୍ଭ୍ୟାଂ ଶୋଭିତଲାଂଗଲଂ ସମୁସଲଂ କାଦମ୍ବରୀ ଚଞ୍ଚଲଂ,
ରତ୍ନାଢ୍ୟଂ ଵରକୁଣ୍ଡଲଂ ଭୁଜବଲୈରାକାଂତ ଭୂମଣ୍ଡଲମ୍ ।
ଵଜ୍ରାଭାମଲଚାରୁ ଗଣ୍ଡୟୁଗଲଂ ନାଗେନ୍ଦ୍ରଚୂଡୋଜ୍ଜ୍ଵଲଂ
ସଂଗ୍ରାମେ ଚପଲଂ ଶଶାଂକଧଵଲଂ ଶ୍ରୀକାମପାଲଂ ଭଜେ ॥ ୫॥
II ଇତି ଶ୍ରୀଜଗନ୍ନାଥପଞ୍ଚକଂ ସମାପ୍ତମ୍ ॥