କଲ୍ୟାଣଵୃଷ୍ଟି ସ୍ତଵଃ
କଲ୍ୟାଣଵୃଷ୍ଟିଭିରିଵାମୃତପୂରିତାଭି-
-ର୍ଲକ୍ଷ୍ମୀସ୍ଵୟଂଵରଣମଂଗଲଦୀପିକାଭିଃ ।
ସେଵାଭିରଂବ ତଵ ପାଦସରୋଜମୂଲେ
ନାକାରି କିଂ ମନସି ଭାଗ୍ୟଵତାଂ ଜନାନାମ୍ ॥ 1 ॥
ଏତାଵଦେଵ ଜନନି ସ୍ପୃହଣୀୟମାସ୍ତେ
ତ୍ଵଦ୍ଵଂଦନେଷୁ ସଲିଲସ୍ଥଗିତେ ଚ ନେତ୍ରେ ।
ସାଂନିଧ୍ୟମୁଦ୍ୟଦରୁଣାୟୁତସୋଦରସ୍ୟ
ତ୍ଵଦ୍ଵିଗ୍ରହସ୍ୟ ପରୟା ସୁଧୟାପ୍ଲୁତସ୍ୟ ॥ 2 ॥
ଈଶତ୍ଵନାମକଲୁଷାଃ କତି ଵା ନ ସଂତି
ବ୍ରହ୍ମାଦୟଃ ପ୍ରତିଭଵଂ ପ୍ରଲୟାଭିଭୂତାଃ ।
ଏକଃ ସ ଏଵ ଜନନି ସ୍ଥିରସିଦ୍ଧିରାସ୍ତେ
ୟଃ ପାଦୟୋସ୍ତଵ ସକୃତ୍ପ୍ରଣତିଂ କରୋତି ॥ 3 ॥
ଲବ୍ଧ୍ଵା ସକୃତ୍ତ୍ରିପୁରସୁନ୍ଦରି ତାଵକୀନଂ
କାରୁଣ୍ୟକନ୍ଦଲିତକାନ୍ତିଭରଂ କଟାକ୍ଷମ୍ ।
କନ୍ଦର୍ପକୋଟିସୁଭଗାସ୍ତ୍ଵୟି ଭକ୍ତିଭାଜଃ
ସଂମୋହୟନ୍ତି ତରୁଣୀର୍ଭୁଵନତ୍ରୟେଽପି ॥ 4 ॥
ହ୍ରୀଂକାରମେଵ ତଵ ନାମ ଗୃଣନ୍ତିଵେଦା
ମାତସ୍ତ୍ରିକୋଣନିଲୟେ ତ୍ରିପୁରେ ତ୍ରିନେତ୍ରେ ।
ତ୍ଵତ୍ସଂସ୍ମୃତୌ ୟମଭଟାଭିଭଵଂ ଵିହାୟ
ଦୀଵ୍ୟନ୍ତି ନନ୍ଦନଵନେ ସହ ଲୋକପାଲୈଃ ॥ 5 ॥
ହନ୍ତୁଃ ପୁରାମଧିଗଲଂ ପରିପୀୟମାନଃ
କ୍ରୂରଃ କଥଂ ନ ଭଵିତା ଗରଲସ୍ୟ ଵେଗଃ ।
ନାଶ୍ଵାସନାୟ ୟଦି ମାତରିଦଂ ତଵାର୍ଥଂ
ଦେହସ୍ୟ ଶଶ୍ଵଦମୃତାପ୍ଲୁତଶୀତଲସ୍ୟ ॥ 6 ॥
ସର୍ଵଜ୍ଞତାଂ ସଦସି ଵାକ୍ପଟୁତାଂ ପ୍ରସୂତେ
ଦେଵି ତ୍ଵଦଂଘ୍ରିସରସୀରୁହୟୋଃ ପ୍ରଣାମଃ ।
କିଂ ଚ ସ୍ଫୁରନ୍ମକୁଟମୁଜ୍ଜ୍ଵଲମାତପତ୍ରଂ
ଦ୍ଵେ ଚାମରେ ଚ ମହତୀଂ ଵସୁଧାଂ ଦଦାତି ॥ 7 ॥
କଲ୍ପଦ୍ରୁମୈରଭିମତପ୍ରତିପାଦନେଷୁ
କାରୁଣ୍ୟଵାରିଧିଭିରମ୍ବ ଭଵାତ୍କଟାକ୍ଷୈଃ ।
ଆଲୋକୟ ତ୍ରିପୁରସୁନ୍ଦରୀ ମାମନାଥଂ
ତ୍ଵୟ୍ୟେଵ ଭକ୍ତିଭରିତଂ ତ୍ଵୟି ବଦ୍ଧତୃଷ୍ଣମ୍ ॥ 8 ॥
ହନ୍ତେତରେଷ୍ଵପି ମନାଂସି ନିଧାୟ ଚାନ୍ୟେ
ଭକ୍ତିଂ ଵହନ୍ତି କିଲ ପାମରଦୈଵତେଷୁ ।
ତ୍ଵାମେଵ ଦେଵି ମନସା ସମନୁସ୍ମରାମି
ତ୍ଵାମେଵ ନୌମି ଶରଣଂ ଜନନି ତ୍ଵମେଵ ॥ 9 ॥
ଲକ୍ଷ୍ୟେଷୁ ସତ୍ସ୍ଵପି କଟାକ୍ଷନିରୀକ୍ଷଣାନା-
-ମାଲୋକୟ ତ୍ରିପୁରସୁନ୍ଦରୀ ମାଂ କଦାଚିତ୍ ।
ନୂନଂ ମୟା ତୁ ସଦୃଶଃ କରୁଣୈକପାତ୍ରଂ
ଜାତୋ ଜନିଷ୍ୟତି ଜନୋ ନ ଚ ଜାୟତେ ଵା ॥ 10 ॥
ହ୍ରୀଂ ହ୍ରୀମିତି ପ୍ରତିଦିନଂ ଜପତାଂ ତଵାଖ୍ୟାଂ
କିଂ ନାମ ଦୁର୍ଲଭମିହ ତ୍ରିପୁରାଧିଵାସେ ।
ମାଲାକିରୀଟ ମଦଵାରଣ ମାନନୀୟା
ତାନ୍ସେଵତେ ଵସୁମତୀ ସ୍ଵୟମେଵ ଲକ୍ଷ୍ମୀଃ ॥ 11 ॥
ସମ୍ପତ୍କରାଣି ସକଲେନ୍ଦ୍ରିୟ ନନ୍ଦନାନି
ସାମ୍ରାଜ୍ୟ ଦାନ ନିରତାନି ସରୋରୁ ହାକ୍ଷି ।
ତ୍ଵଦ୍ଵନ୍ଦନାନି ଦୁରିତା ହରଣୋ ଦ୍ୟତାନି
ମାମେଵ ମାତରନିଶଂ କଲୟନ୍ତୁ ନାନ୍ୟମ୍ ॥ 12 ॥
କଲ୍ପୋପସଂହୃତିଷୁ କଲ୍ପିତତାଣ୍ଡଵସ୍ୟ
ଦେଵସ୍ୟ ଖଣ୍ଡପରଶୋଃ ପରଭୈରଵସ୍ୟ ।
ପାଶାଙ୍କୁ ଶୈକ୍ଷ ଵଶରାସନ ପୁଷ୍ପବାଣା
ସା ସାକ୍ଷିଣୀ ଵିଜୟତେ ତଵ ମୂର୍ତିରେକା ॥ 13 ॥
ଲଗ୍ନଂ ସଦା ଭଵତୁ ମାତରିଦଂ ତଵାର୍ଧଂ
ତେଜଃ ପରଂ ବହୁଲକୁଙ୍କୁମପଙ୍କ ଶୋଣମ୍ ।
ଭାସ୍ଵତ୍କିରୀଟ ମମୃତାଂ ଶୁକଲାଵତଂସଂ
ମଧ୍ୟେ ତ୍ରିକୋଣନିଲୟଂ ପରମାମୃତାର୍ଦ୍ରମ୍ ॥ 14 ॥
ହ୍ରୀଙ୍କାରମେଵ ତଵ ନାମ ତଦେଵ ରୂପଂ
ତ୍ଵନ୍ନାମ ଦୁର୍ଲଭମିହ ତ୍ରିପୁରେ ଗୃଣଂତି ।
ତ୍ଵତ୍ତେଜସା ପରିଣତଂ ଵିୟଦାଦିଭୂତଂ
ସୌଖ୍ୟଂ ତନୋତି ସରସୀରୁହସମ୍ଭଵାଦେଃ ॥ 15 ॥
ହ୍ରୀଙ୍କାର ତ୍ରୟସମ୍ପୁଟେନ ମହତା ମନ୍ତ୍ରେଣ ସଂଦୀପିତଂ
ସ୍ତୋତ୍ରଂ ୟଃ ପ୍ରତିଵାସରଂ ତଵ ପୁରୋ ମାତର୍ଜପେନ୍ମନ୍ତ୍ରଵିତ୍ ।
ତସ୍ୟ କ୍ଷୋଣିଭୁଜୋ ଭଵନ୍ତି ଵଶଗା ଲକ୍ଷ୍ମୀଶ୍ଚିରସ୍ଥାୟିନୀ
ଵାଣୀ ନିର୍ମଲ ସୂକ୍ତିଭାର ଭାରିତା ଜାଗର୍ତି ଦୀର୍ଘଂ ଵୟଃ ॥ 16 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିନ୍ଦ ଭଗଵତ୍ପୂଜ୍ୟପାଦ ଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ କଲ୍ୟାଣଵୃଷ୍ଟି ସ୍ତଵଃ ।