ଅଥ ତ୍ରିପୁରସୁନ୍ଦରୀ ଅଷ୍ଟକମ୍ ।
କଦମ୍ବବନଚାରିଣୀଂ ମୁନିକଦମ୍ବକାଦମ୍ବିନୀଂ
ନିତମ୍ବଜିତ ଭୂଧରାଂ ସୁରନିତମ୍ବିନୀସେବିତାମ୍ ।
ନବାମ୍ବୁରୁହଲୋଚନାମଭିନବାମ୍ବୁଦଶ୍ୟାମଲାଂ
ତ୍ରିଲୋଚନକୁଟୁମ୍ବିନୀଂ ତ୍ରିପୁରସୁନ୍ଦରୀମାଶ୍ରୟେ ॥ ୧॥
କଦମ୍ବବନବାସିନୀଂ କନକବଲ୍ଲକୀଧାରିଣୀଂ
ମହାର୍ହମଣିହାରିଣୀଂ ମୁଖସମୁଲ୍ଲସଦ୍ୱାରୁଣୀମ୍ ।
ଦୟାବିଭବକାରିଣୀଂ ବିଶଦଲୋଚନୀଂ ଚାରିଣୀଂ (ଦୟିତପାର୍ଶ୍ୱସଞ୍ଚାରିଣୀଂ)
ତ୍ରିଲୋଚନକୁଟୁମ୍ବିନୀଂ ତ୍ରିପୁରସୁନ୍ଦରୀମାଶ୍ରୟେ ॥ ୨॥
କଦମ୍ବବନଶାଲୟା କୁଚଭରୋଲ୍ଲସନ୍ମାଲୟା
କୁଚୋପମିତଶୈଲୟା ଗୁରୁକୃପାଲସଦ୍ୱେଲୟା ।
ମଦାରୁଣକପୋଲୟା ମଧୁରଗୀତବାଚାଲୟା
କୟାଽପି ଘନନୀଲୟା କବଚିତା ବୟଂ ଲୀଲୟା ॥ ୩॥
କଦମ୍ବବନମଧ୍ୟଗାଂ କନକମଣ୍ଡଲୋପସ୍ଥିତାଂ
ଷଡମ୍ବୁରୁହବାସିନୀଂ ସତତସିଦ୍ଧସୌଦାମିନୀମ୍ ।
ବିଡମ୍ବିତଜପାରୁଚିଂ ବିକଚଚନ୍ଦ୍ରଚୂଡାମଣିଂ
ତ୍ରିଲୋଚନକୁଟୁମ୍ବିନୀଂ ତ୍ରିପୁରସୁନ୍ଦରୀମାଶ୍ରୟେ ॥ ୪॥
କୁଚାଞ୍ଚିତବିପଞ୍ଚିକାଂ କୁଟିଲକୁନ୍ତଲାଲଙ୍କୃତାଂ
କୁଶେଶୟନିବାସିନୀଂ କୁଟିଲଚିତ୍ତବିଦ୍ୱେଷିଣୀମ୍ ।
ମଦାରୁଣବିଲୋଚନାଂ ମନସିଜାରିସଂମୋହିନୀଂ
ମତଙ୍ଗମୁନିକନ୍ୟକାଂ ମଧୁରଭାଷିଣୀମାଶ୍ରୟେ ॥ ୫॥
ସ୍ମରପ୍ରଥମପୁଷ୍ପିଣୀଂ ରୁଧିରବିନ୍ଦୁନୀଲାମ୍ବରାଂ
ଗୃହୀତମଧୁପାତ୍ରିକାଂ ମଦବିଘୂର୍ଣନେତ୍ରାଞ୍ଚଲାମ୍ ।
ଘନସ୍ତନଭରୋନ୍ନତାଂ ଗଲିତଚୂଲିକାଂ ଶ୍ୟାମଲାଂ
ତ୍ରିଲୋଚନକୁଟୁମ୍ବିନୀଂ ତ୍ରିପୁରସୁନ୍ଦରୀମାଶ୍ରୟେ ॥ ୬॥
ସକୁଙ୍କୁମବିଲେପନାମଲକଚୁମ୍ବିକସ୍ତୂରିକାଂ
ସମନ୍ଦହସିତେକ୍ଷଣାଂ ସଶରଚାପପାଶାଙ୍କୁଶାମ୍ ।
ଅଶେଷଜନମୋହିନୀମରୁଣମାଲ୍ୟ ଭୂଷାମ୍ବରାଂ
ଜପାକୁସୁମଭାସୁରାଂ ଜପବିଧୌ ସ୍ମରାମ୍ୟମ୍ବିକାମ୍ ॥ ୭॥
ପୁରନ୍ଦରପୁରନ୍ଧ୍ରିକା ଚିକୁରବନ୍ଧସୈରନ୍ଧ୍ରିକାଂ
ପିତାମହପତିବ୍ରତା ପୁଟପଟୀରଚର୍ଚାରତାମ୍ ।
ମୁକୁନ୍ଦରମଣୀମଣୀଲସଦଲଙ୍କ୍ରିୟାକାରିଣୀଂ
ଭଜାମି ଭୁବନାମ୍ବିକାଂ ସୁରବଧୂଟିକାଚେଟିକାମ୍ ॥ ୮॥
॥ ଇତି ଶ୍ରୀମଦ୍ ଶଙ୍କରାଚାର୍ୟବିରଚିତଂ
ତ୍ରିପୁରସୁନ୍ଦର୍ୟଷ୍ଟକଂ ସମାପ୍ତମ୍ ॥